ఎందుకిలా చేస్తారో! ఈ మనుషు లెందుకిలా మనసులతో ఆడుకుంటారో!

ఎందుకిలా చేస్తారో!
ఈ మనుషు లెందుకిలా మనసులతో ఆడుకుంటారో!

మాకది ఇస్తే మీకిది ఇస్తాం అని ఆశలు రేపుతారు -
మనం ఇస్తే పుచ్చుకుని నవ్వుకుంటారు గానీ,
మనకి ఇవ్వాల్సింది ఇవ్వడానికి ఏడుస్తారు!
చేసిన పాపం ఇంగువ కట్టిన మూట.
ఏం బావుకుంటారు?

మీరూ మేమూ ఒకటే అంతా సమానమే అంటారు -
మనల్ని కటికనేల మీద కూర్చోబెడతారు,
వాళ్ళు పట్టు బాలీసుల మీద కూర్చుంటారు!
మరొకడొచ్చి కిందకి లాగేవరకే పటాటోపం.
ఏం సుఖపడతారు?

కాలు కందకుండా చూసుకుంటానని కబుర్లు చెబుతారు -
మూరెడు మల్లెలు కొనలేని వెధవలు కూడా
మల్లెపూల మంచం కోసం కలలు గంటారు!
మంచం దిగాక తెలుస్తుంది మగతనం.
ఏం ఉద్దరిస్తారు?

తనని ప్రేమిస్తే స్వర్గం చూపిస్తానని కోతలు కోస్తారు -
ప్రేమిస్తే ఇంకాస్త ప్రేమించమని అంటారు,
కాదంటే వాళ్ళే చంపి స్వర్గానికి పంపిస్తారు!
చిప్పకూడు తినేప్పుడు తెలుస్తుంది నిజం.
ప్రేమంటే బతికించడం తప్ప
చంపడం కాదని,ఏం లాభం?

ఇతరుల్ని మోసం చెయ్యడమే గొప్ప తెలివి అనుకుంటారు -
ఇతరుల్ని మోసం చేస్తూ మీసాలు మెలేస్తారు,
ఇతరులు మోసం చేస్తే పళ్ళు కొరుకుతారు!
ఏం మూర్ఖత్వం వాళ్ళది?
ఎంత సిగ్గులేని తనం!

ఎందుకిలా చేస్తారో!
ఈ మనుషు లెందుకిలా ఆత్మల్ని అమ్ముకుని బతుకుతారో!