విశ్వతోభద్ర కార్యకర్తలకు రెండవ పాఠం

మన నిజమైన శత్రువుని గుర్తుపట్టటం ఎలా?

ప్రతి క్షణమూ కళ్ళముందు కనిపిస్తున్న శత్రువుని గుర్తు పట్టలేకపోవటానికి కారణం ఏమిటి?చిన్నప్పుడు పెద్దవాళ్ళు అన్నం తినకపోతే  బూచాడు వచ్చి ఎత్తుకుపోతాడని అంటే భయం వేస్తుంది!భయం వేసి గబుక్కున అన్నం తినేశాం గాబట్టి ఆ బూచాడు రానూ లేదు, మనం  చూడనూ లేదు.దీనివల్ల ఏం జరిగింది?పెద్ద ఘోరం ఏమీ జరగలేదు కానీ బూచాడు ఎలా ఉంటాడో తెలియక కొంచెం పెద్దయ్యాక నవ్వుకోవటం మాత్రమే జరిగింది!

ఆ కొంచెం పెద్దయ్యాక అప్పుడు అమ్మమ్మలూ తాతయ్యలూ చెప్పిన కధల్లోని ఒంటికన్ను రాక్షసులూ మిడిగుడ్ల పిశాచులూ కొరివి దెయ్యాలూ కొంత కాలం పాటు భయపెట్టాయి.ఒంటరిగా చీకట్లోకి పెద్దవాళ్ళ తోడు లేకుండా వెళ్ళటం లాంటి సాహసాలు చెయ్యలేదు గాబట్టి వాళ్ళూ మనకు కనపడలేదు.దీనివల్ల ఏం జరిగింది?పెద్ద ఘోరం ఏమీ జరగలేదు కానీ ఒంటికన్ను రాక్షసులూ మిడిగుడ్ల పిశాచులూ కొరివి దెయ్యాలూ ఉండవని ఇంకొంచెం పెద్దయ్యాక తెలిసి నవ్వుకోవటం మాత్రమే జరిగింది!

ఆ ఇంకొంచెం పెద్దయ్యాక చూసిన సినిమాల్లోని బొడ్లో కత్తి పెట్టుకుని తిరుగుతున్న గళ్ళ లుంగీ విలన్లు కొంతకాలం భయపెట్టారు.ఆ తర్వాత దొంగ చూపులు చూస్తూ క్రూరమైన డవిలాగులు చెప్తూ పగలబడి నవ్వే రావు గోపాల్రావులు భయపెట్టారు.ఇప్పుడు కొంచెం అందమైన మొహంతో కనిపిస్తూ వెధవపన్లు చేస్తున్న సోనూ సూద్ లాంటివాళ్ళు భయపెడుతున్నారు.దీనివల్ల ఏం జరిగింది?పెద్ద ఘోరం ఏమీ జరగలేదు కానీ మనం చాలా తెలివైన వాళ్ళమనీ మనల్ని ఎవరూ మోసం చెయ్యలేరనీ దుర్మార్గాలు చేసేవాళ్ళని చూసీ చూడగానే కనిపెట్టెయొచ్చుననే అతి తెలివి లాంటి తెలివి తక్కువ తనం ప్రజలకి సహజ కవచ కుండలాల మాదిరి అమరిపోయాయి.

అటునుంచి మన నిజమైన శత్రువులు మాత్రం మనం నమ్ముతున్నట్టు చీకటి గుహల్లో పాతాళ భైరవిని ప్రసన్నం చేసుకోవడం కోసం ఉజ్జయిని రాకుమారిని పెళ్ళాడి రాజవ్వాలనుకున్న తోటరాముణ్ణి ఆశపెట్టి తనవెంట తీసుకుపోయి దేవికి బలి ఇచ్చి అతీంద్రియ శక్తులు పొందాలనుకునే నేపాళ మాంత్రికుల మాదిరి లేరు,కనీసం క్రూరమైన చూపులతో వెటకారపు మాటలు మాట్లాడే రావు గోపాల రావులా కూడా లేరు,హీనపక్షం సోనూ సూదులా కూడా లేరు - మరి ఎలా ఉన్నారయ్యా అంటే!

"అరెరెరెరే, కొత్తా దేవుళ్ళండీ కొంగొత్తా దేవుళ్ళండీ!

అరెరెరెరే, నవ్వు మొహాల్తో ఉంటారండీ నైసునైసుగా ఉంటారండీ!

అరెరెరెరే, విషపు చూపులు చూడరండీ వెటకారం ఆడనే ఆడరండీ!

అరెరెరెరే, నోట్లో వేలెడితే కొరకలేనట్టు ఉంటారండీ అవునండీ!

అరెరెరెరే, ఈ చేత్తో వాళ్ళు మీకు వెయ్యి రూపాయలు ఇస్తారండీ!

అరెరెరెరే, ఆ చేత్తో మీరు వాళ్ళకు లక్ష రూపాయలు ఇస్తారండీ!

అరెరెరెరే, కచ్చిపుట్టి తిట్టినా కొట్టినా ఛీ కొట్టినా నవ్వేస్తారండీ!

అరెరెరెరే, మీరు వాళ్ళని చంపలేరండి చచ్చినా బతికొస్తారండీ!

అరెరెరెరే, మీలోనూ ఉంటారండి అప్పుడప్పుడు బయటి కొస్తారండీ!

అరెరెరెరే, కొత్తా దేవుళ్ళండీ కొంగొత్తా దేవుళ్ళండీ!"

మనం మన శత్రువుల్ని గుర్తు పట్టలేకపోవటానికి మన అజ్ఞానం ఎప్పటికీ కారణం కాదు.నేను గుర్తు పట్టిన కళ్ళ ముందు కనపడుతున్న మన నిజమైన శత్రువుల్ని మీరు గుర్తు పట్టలేకపోతున్నారు అని అనడం మిమ్మల్ని అవమానిస్తున్నట్టు కాదు, వాళ్ళు మనచుట్టు పన్నిన ఉచ్చు వెనక ఉన్న సృజనాత్మకత అంత గొప్పది!

ఇంద్ర సినిమాలో చిరంజీవి గారు "నేను మీ కోసమే పుట్టాను!" అని కెమెరా ముందు తెరముందు ఉన్నవాళ్ళ కళ్ళలోకి చూస్తూ అంటే అప్పుడప్పుడే ఆయన రాజకీయాల్లోకి వస్తారన్న వార్తలతో దానికీ దీనికీ లింకు పెట్టేసుకుని చప్పట్లు కొట్టేశారు.ఒక డ్యూయెట్టులో హీరోయినుతో ఆయన గారి గుండీల మీద ఠపీఠపీమని గుద్దించి "నీకే వేస్తా నా వోటు!" అని పాట కూడా పాడించేశారు!ఆయన కూడా ఆ చప్పట్లు వోట్లని తెచ్చిపెడతాయని నమ్మేశారు.పార్టీ పెట్టారు.ఆయన పెట్టిన పార్టీకి కూడా ఆయన సినిమాని జిల్లాల వారీ కొనుగోలుదార్లు గుమిగూడినంత ఆదరణ వచ్చేసి అబ్యర్ధులు పార్టీ టిక్కెట్ల కోసం పోటీలు పడ్డారనీ పార్టీ టిక్కెట్లకి కూడా మంచి ధర పలికిందనీ అలవాటు చొప్పున వాటిని కూడా అమ్ముకున్నారనీ కూడా వార్తలు వచ్చాయి.కానీ, ఏమైంది?అత్తారి వూళ్ళో కూడా పరువు దక్కలేదు!

ఆ కోలాహలంలో ఆయన తమ్ముడు కుర్రతనపు ఆవేశం కొద్దీ ఏ కాంగ్రెసువాళ్ళని పంచెలు వూడగొట్టాలన్నాడో ఆ కాంగ్రెసు గంగలోనే అన్నగారు మునగాల్సి వచ్చింది!ఆ తమ్ముడు గారినే తర్వాత ఆయనకి వెర్రి అభిమానులైన కుర్రకాపులు "పవన్ ఈజ్ గాడ్!" అని మోసెయ్యటంతో అయన కూడా ఆ పొగడ్తలు వోట్లని తెచ్చిపెడతాయని నమ్మేశారు.పార్టీ పెట్టారు.అందర్నీ ప్రశ్నించేస్తాననీ అందరి దుమ్మూ దులిపేస్తాననీ అంటే కొందరు నిజమేననుకుని వుర్రూతల్లూగి  నేరపరిశోధనలో కాకలుదీరిన జేడీ లక్ష్మీనారాయణ గారిలాంటి మేధావులు కూడా ఆ పార్టీలో చేరిపోయారు.కానీ, ఏమైంది?రెండు చోట్ల పోటీ చేసిన తనకి కూడా పరువు దక్కలేదు!

తనకే ఠికాన లేని తనాన్ని చూసి కూడా లేని పొలిటికల్ హీరోయిజాన్ని అరువు తెచ్చుకుని 151/175 సీట్లతో గెల్చిన జగన్ని తర్జని చూపించి బెదిరించి సైన్మ డవిలాగులు దంచి అదరగొట్టబోయి రౌడీ రెడ్లు రెచ్చిపోయి జనసైనికుల్ని మురుక్కాలవల్లో పడేసి తంతే బిక్కచచ్చిపోయి దిక్కు తోచక అప్పుడెప్పుడో తను ఏ పార్టీవాళ్ళని పంచెలు వూడదీసి తన్నాలని అన్నాడో ఆ పార్టీలా మారిపోయిన ఇప్పటిప్పటి కొత్తరోజుల్లో పోరాడతానన్న ఉత్తరాది పార్టీవాళ్ళకి స్టెపినీలా తయారై ఇతరులు అడుగుతున్న ప్రశ్నలకి జవాబులు చెప్పలేని స్థితికి దిగజారిపోయాడు!

వీళ్ళిద్దర్నీ నమ్మకపోవడం వోటర్ల తెలివే అనిపిస్తుంది కొందరికి!తెదెపా వాళ్ళు అయితే వీళ్ళు చీల్చిన వోట్ల వల్ల వాళ్ళు వోడిపోయారు గాబట్టి అన్నదమ్ములకు కమ్మకుల ద్వేషాన్నీ రెడ్డికుల ప్రియత్వాన్నీ అంటగట్టేస్తున్నారు.తెదెపా వాళ్ళు చూపిస్తున్న ఈ అన్నదమ్ములు ఆ తండ్రీ కొడుకుల్ని తరచూ గానీ కొంచెం ఎక్కువ సార్లు కలవటం అనే సాక్ష్యం రామారావుకీ చంద్రబాబుకీ కూడా వర్తిస్తుంది.అసలు రాజకీయాల్లోకి వచ్చే ఆలోచన కూడా లేని కాలంలో సినిమా పరిశ్రమలోని ప్రముఖుడు అన్న గుర్తింపుతో కాంగ్రెసు ముఖ్యమంత్రుల్ని రామారావు కలిశాడు,వాళ్ళు కూడా అతనితో సాదర సంభాషణలు చేశారు.కాబట్టి తెదెపా వాళ్ళ ఏడుపుల్ని పట్టించుకోనవసరం లేదు.

ఇంతకీ అన్నదమ్ములు రాజకీయానుభవం లేకపోవడం వల్ల తెలివితక్కువ ఎత్తుగడలు వెయ్యటం తప్ప అవినీతిపరులూ కాదు, అక్రమార్జన కోసం రాజకీయాల్లోకి రాలేదు.అయినప్పటికీ వాళ్ళని నమ్మి వాళ్ళకి అధికారం ఇవ్వని వోటర్లు అవినీతి చేశాడనటానికి తిరుగు లేని సాక్ష్యాలు ఉన్న జగన్ని ఎట్లా నమ్మారు?అన్నదమ్ములు అవినీతీరులు కాకపోయినప్పటికీ తెలివితక్కువ ఎత్తుగడలు వేస్తే జగన్ అవినీతికి సాక్ష్యాలు ఉండటంతో పాటు తండ్రి చనిపోయిన వెంటనే ముఖ్యమంత్రిత్వం కోసం సంతకాల సేకరణతో మొదలై సొంత పార్టీ పెట్టిన మొదటి రోజు నుంచీ ఇప్పటివరకు వేసిన ప్రతి ఒక్క ఎత్తుగడ కూడా వేసెటప్పుడు వాళ్ళకి అద్భుతం అనిపించి ఉండొచ్చు గానీ వేశాక ఎదురు తన్ని గూబ గుయ్యి మనిపించి కొండ నాలిక్కి మందేస్తే ఉన్న నాలిక వూడినట్టు వాళ్ళ పరువునే పోగొట్టి లాక్కోలేక పీక్కోలేక  అభాసుపాలైన పరమ తెలివితక్కువ రండాగొండి వ్యహారం!

పోనీ, అన్నదమ్ములకి రాజకీయానుభవం లేక తెలివితక్కువ ఎత్తులు వేశారు గాబట్టి ప్రజలు వాళ్ళకి ముఖ్యమంత్రి స్థానంలో ఉండి రాష్ట్రాన్ని అభివృద్ధి పధంలో నడిపించగల సమర్ధత ఉందని అనుకోలేదు - సరే, బాగుంది!మరి రాజకీయానుభవం పుష్కలంగా ఉండి అయిదేళ్ళ్ క్రితం ప్రతికక్షులు గెలిచే చాన్సు లేదనుకున్నప్పుడు కూడా గెలిచి అయిదేళ్ళ పాటు విభజన సమస్యలను అధిగమించి కేంద్రం నుంచి రావలసిన ప్రత్యేక హోదా రాకపోయినప్పటికీ మిగులుతో విడిపోయిన తెలంగాణను మించిపోయి ఆంధ్ర రాష్ట్రం యొక్క ఎదుగుదల సూచి కలవడం వల్లనే మొత్తం దేశపు ఎదుగుదల సూచిని రెండంకెలను దాటించిన చంద్రబాబుని నమ్మలేని వోటర్లు అటువంటివే కాదు, అసలు ఏ రకమైన ఘనతలూ లేని జగన్ని ముఖ్యమంత్రి స్థానంలో ఉండి రాష్ట్రాన్ని అభివృద్ధి పధంలో నడిపించగల సమర్ధత ఉందని ఎలా నమ్మారు?

ఇంతటి శుంఠత్వం నుంచి శ్రేష్ఠత్వం వైపుకి నడవటం సాధ్యమా?