శ్రీ రాఘవం!శ్రీ మాధవం!ఆశ్రిత జన మనోహరం!!

-----------------------------------------------------------------------------------------------------------------
గద్య కవిత
-----------------------------------------------------------------------------------------------------------------
ఒక్కొక్క జీవుని యందొక్కొక్క వేదన?

ముజ్జగాల కెల్ల
ముచ్చటైన కరిమేని సొంపువాడు,
సరిలేని రాజసాన ముజ్జగాల నేలెడువాడు!
ఆతదహో!జగదేకధనుర్ధరధీరమతి కరుణాసింధు
వార్తత్రాణపరాయణు డఖిలాండకోటిబ్రహ్మాండనాయకుడు,
మా చూడి కొడుత్త నాంచారు ప్రియవిభుడతడు!

యేమి వేణుగానమది!
నవ రంధ్రముల ఈ తనువా మోవిని తాకి
యెద ఝల్లుమని పులకించి ఇటు రవళించినదో?
లోకాల పాలించుగోపాల బాలుని  
పేదవులు తగిలిన ఆ వెదురు జన్మ మెంతటి ధన్యమో గద!
అంతటి భాగ్యమీఎ జడున కెన్నడు కల్గునో గద?

ఇట్టిది నా జీవుని వేదన!
-----------------------------------------------------------------------------------------------------------------
పద్య కవిత
-----------------------------------------------------------------------------------------------------------------
సీ||యేమి వేణువది?ఆ మోఅహనరవళి ఎ
       చటినుండి తీగలు సాగుతున్న

       దో గద!అంగిలి తాకని సవ్వడి
       నవరంధ్రముల ఈ తనువున యేల

       పుట్టెను?ఆ మోవియొకవేళ తగిలి యె
       డద ఝల్లుమనగ ఇటు రవళించె

       నో?లోకపాలకుదౌ గోపాలబాలుని
       పేదవులు తగిలిన వెదురు జన్మ

తే||మెంత ధన్యమో గద!మరి అంత భాగ్య
      మీ జడున కెప్డు కల్గునో?మాయదారి
      పిల్లగాడొక డూదిన పిల్లగోరు
      కాదు - జీవుల కడతేర్చు గానమోయి?!

సీ||అంతర్యామి!సుజన మంగళకరుడు!ము
       చ్చట గూర్చు కరిమేని సొంపువాడు!

       ఆతడహో,జగదేక దనుర్ధర
       ధీరమతి కరుణాసింధు వార్త

       త్రాణపరాయణు డఖిలాందకోటి
       బ్రహ్మాండనాయకుడు!అంతకుల వైరి!

       సరిలేని రాజసాన నఖిల లోకాల
       నేలెడు వాడు!తనే మనిషిగ

తే||వచ్చి పెద్దాయన నడిగి వేడ్క పెండ్లి
      యాడి మా చూడికొడుత నాంచారు కెంతొ
      నచ్చిన నిజవిభుడతడు!అతని నేన
      డిగెద నక్షయసౌఖ్యాల నెల్లరకును?!
-----------------------------------------------------------------------------------------------------------------

శ్రీరమ సీతయై శ్రీనిధితో పలికిన పలుకుల మెరిసినది తెలుగు వారి జీవనదము - గోదావరీ మాత!

సీ||శ్రీరమ సీతయై శ్రీనిధితో పలి
    కిన పలుకుల మెరిసినది తెలుగు

    వారి జీవనదము - గోదావరీ మాత!
    దక్షిణ గంగ!వేదములను విని

    వేదములను పలికే చిలుకల కొలి
    కి! పొడుపు మలపైకి ఇనుడు రాక

    మున్నె దేవతలు తా మునిగి తరించు మ
    హిమలు గల రసధుని!వగపేల

తే||ఆంధ్రులార,గోదావరి పారునంత
     వరకు మనకిక తిరుగు లేదండి!పట్టి
     గుండెలో నిల్పి దేవిలా కొల్చి హార
     తులను ఇవ్వరే - తల్లికి తగిన రీతి?!
(30/06/2015)

పవిత్రతలోనూ ప్రాముఖ్యతలోనూ పరీవాహక ప్రాంతంలోనూ గంగానది తర్వాత రెందవ స్థానం గోదవరి నదికి దక్కుతుంది భరతఖందపు జీవనదు లన్నింటిలోనూ!అటువైపున అరేబియన్ సముద్రానికి 80 కిలోమీటర్ల దూరంలో పశ్చిమ కనుమల్లో మహారాష్ట్రలోని నాసిక్ జిల్లాలో కొలువై ఉన్న త్రయంబకేశ్వరుని పదసన్నిధిలో పుట్టిన ఈనది సుమారు 1,465 కిలోమీటర్ల దూరం ప్రవహించినంత మేరా భూమిని సారవంతం చేస్తూ చత్తీస్ గఢ్,మహారాష్ట్ర,తెలంగాణ,ఆంధ్రప్రదేశ్,మధ్యప్రదేశ్,ఒడిషా రాష్ట్రవాసుల్ని ఆప్యాయంగా పలకరిస్తూ తెలుగువారికి అపరిమితానందాన్ని కలిగిస్తూ  అటువైపున పశ్చిమ గోదావరి జిల్లాలోని నరసాపురం దగ్గిర తూర్పు కనుమల్ని చేరుకుని బంగాళాఖాతంలో కలుస్తూ అత్యంత సారవంతమైన భూముల్ని మరింతగా తన జీవజలంతో అభిషేకిస్తున్నది!

నిజామాబాద్ జిల్లాలోని కందకుర్తిలో ఈనది తెలుగువాళ్ళని పలకరించటం మొదలవుతుంది.ఆదిలాబాద్ జిల్లాలోని బాసర అనే ప్రపంచంలోనే అపురూపమైన సరస్వతీ నిలయం ఈ నదికి అనుబంధమైనదే!ఈ నదీతీరంలోని నగరాలలో రాజమహేంద్రవరానిది వేయి స్తంభాలతో రామప్ప గుదిలోని యక్షిణీ శిల్పాలతో కోటిలింగాలతో కొలువుదీరిన శోభాయమాన్మైఅన ఘనత!ఈ నగరాన్ని దాటాక గౌతమీ గోదావరి, వశిష్ఠ గోదావరి అనే రెండు శాఖలుగా చీలుతుంది.గౌతమి మళ్ళీ గౌతమి,నీలరేవు అనే రెండు పాయలుగా చీలుతుంది.అటు వశిష్ఠ కూడా వశిష్ఠ, వైనతేయ అనే రెందు పాయలుగా చీలుతుంది.ఈ నాల్గు పాయలతో సోదరి కృష్ణతో కలిసి ఆ నడిమధ్యన సిరులు పొంగిపొరలే వరిధాన్యపు గంపని యెత్తుకుని ఆంధ్రమాత నిలబడింది పచ్చనాకు సాక్షిగా!

ఈ నది పుట్టుకకి సంబంధించిన కధలో రామకధ లోని అహల్యా గౌతముల కధ వినిపిస్తుంది.కానీ ఈ కధలో రామకధ ప్రస్తావన యేమీ ఉండదు.ఈ గౌతమ ఋషి తన భార్య అహల్యతో కలిసి భ్రహ్మగిరి పైన కాపుర ముండేవాడు.ఒకనాడు తన ధాన్యపురాశిని దొంగిలించి తింటున్న గోవుని అదిలించటానికి దర్భను వాడగా గోవు చనిపోతుంది!అప్పుడు ఆ గోహత్యా పాతకాన్ని శమింపజేసుకోవడానికి శివుణ్ణి ప్రార్ధించగా శివుడు మెచ్చి త్ర్యంబకేశ్వరుడుగా అవతరించి గంగను వదిలాడు.ఆ జలధారయే గౌతముని పేర గౌతమి అనీ పాపపరిహారానికి సాయపడింది గనుక గోదావరి అనీ పిలువబడుతున్నది!

భారతీయులు యే నదినైనా పుణ్యక్షెత్రాలతో కొలువుదీర్చి పుష్కరస్నానాలతో తమనీ తమ సమస్త లౌకిక పారలౌకికమైన విషయాలన్నింటిలోనూ ఆ నదితో మమేకం అవుతూ ఉంటారు కదా!నాసిక్ సింహాష్ట కంభమేళా ప్రసిధ్ధం!త్ర్యంబకేశ్వరం 12 జ్యోతిర్లింగాలతో కొలువుదీరిన శివక్షేత్రం!నాందేడ్ శిఖ్కుల పుణ్యక్షేత్రం!పైఠాన్ యేకనాధ నిలయం!ధర్మపురిది అప్పటివరకూ ఉత్తర దిక్కుగా ప్రవహించే దిశని మార్చుకుని దక్షిణ వాహినియై నృసింహస్వామి కొలువుదీరిన అంగరంగ వైభోగం!వ్యాసుడు ప్రతిష్ఠించినాడని భావించే వ్యాసర బాసరగా మారిన సరస్వతీ నిలయం!దక్షిణ గంగాతీరంలో దక్షిణ అయోధ్యగా ప్రకాశించే భద్రాచలం!ఆంధ్రప్రాంతంలోని మరో త్రివేణీసంగమంలో ముక్తేశ్వరుడు కొలువుదీరిన కాళేశ్వరం!తెలుగుకి కావ్యగౌరవం కల్పించిన ఆదికవి నన్నయ్య తిరుగాడిన రాజమహేంద్రి పుష్కర శోభ అనన్యసామాన్యం!

గౌతముని పాపాలను పోగొడుతూ పుట్టిన గోదావరి సర్వులకూ కల్మషహారిణి అగుగాక!

నానాటి బ్రతుకు దుర్భరము, ఈశ్వరా!

సీ||      యేది చేయందగు నేది తగదనేది
           తెలిసిన మనిషి పతనము చూడ

           డు. గొడుగొక్కటి,చెప్పులు, ఒక సంచి, కలుక్కు
           మంటున్న ముల్లొక టండి ఈశు

           డు మనల్ని పంపేప్పుడు మనకిచ్చు బహు చి
           త్రపు కాన్కలు: సలుపు తగిలి నప్పు

           డల్లాను కంటి చెలమలూ పెదిమలపై
           నవ్వులూ కలిపి మందును తయారు

తే||      చేసుకోవాలి.చెప్పు లర్గే వరకు న
           డవక తప్పదు, వెతుకు లాడ్డాన్కి సంచి
           ఉంది.యెండవానకి గొడుగుంది - ఇంత
           కన్న యేముంటది సగటు మనిషి బతుకు?
(22/03/2014)
-----------------------------------------------------------------------------------------------------------------

పుట్టిన ప్రతి మనిషికీ పుట్టుకతో వచ్చేవి - ధర్మాధర్మ విచక్షణజ్ఞానం.అదనంగా కష్టాల్లో తోడుగా వుండే ఒక గొడుగు,యెందుకు బతకాలనే ప్రశ్నకు జవాబుగా ఒక లక్ష్యం రూపంలో నడవాల్సిన దారికి గుర్తుగా ఒక జత చెప్పులు,మనకు భగవంతుడు ఇవ్వాలనుకున్నవి అన్నీ మూటగట్టిన సంచితం అనే సంచి,అన్నీ వున్నట్టుగా అనిపించినా యేదో లోపించినట్టుగా అనిపించే ఒక బాధ! వీటినే అటూ ఇటూ తిరగేసి మరగేసి వాడుకుంటూనే బతకాలి ప్రతివాడూ!!

యెన్నికల వేళ పంచటానికి ఒక సీసాడు పద్యం!

సీ||          యెవడండి ఇక్కడ చెవిలోన పూల్గుత్తి
                 పెట్టుకు తిరిగేటి పిచ్చి వెధవ?

                  లేకి మాటలు వాగి, లేని వాటికి ఆశ
                  చూపించి, రూక లిచ్చి తమ వోటు

                  ను కొను దండగమారి నేత లందరు గొప్ప
                  నీతిపరు లనుకొని, కుల గోత్ర

                  ములకు విలువ నిచ్చి, మోసకారుల నదే
                  పనిగ పోటీకి దింపేటి పాత

తే||            కులను గొప్పవారని నమ్మి, కాస్త మేలు
                   కే దభాలున పడిపోయి కాటి కాప
                   రులను మించిన వార్ని కుర్చీల పైన
                   చేర్చి - బంగరు భవిత కాశ పడు వాడు!
(20/04/2014)

జన్మాంతర సౌహృదాలు పల్కరించిన వేళ

సీ||      జన్మాంతరపు సౌహృదము లేవొ పల్కరిం
           చిన యట్లు తోచెను చిన్ని మాధ

           విని చూడగానె, విచ్చిన పారిజాతమ
           ల్లె కనబడింది పాలు మరవని ప

           సి తనపు నిద్రలో, ఇది వీడ్కి పెండ్లాము
           అవుతుందనో ఏమొ అమ్మ లక్క

           లందరు మేలమాడంగ -  పైనున్న త
           ధాస్తు దేవతలు తధాస్తు చెప్పు

తే||       నట్టు అప్పుడే తొలిముద్దు నిచ్చి వేస్తి!
            కామ మెరుగని వయసులో కాంక్ష విత్తు
            మొలిచి పాతికేండ్లకు నేడు మొక్క లాగ
            మారి ఒకగూటి పక్షుల మైతి మిపుడు!!
(08/04/2014)

బంగారం, నువ్వంటే నాకెంతో ఇష్టం రా! ఇంత ఇష్టపడి చేసుకున్నా నా అసమర్ధత వల్ల నిన్ను సుఖపేట్ట లేకపోతున్నా నెందుకో?

యేదీ కలిసి రావడం లేదు. కొందరికి మట్టి ముట్టుకుంటే బంగార మవుతుంది. నేను బంగారం ముట్టుకున్నా మట్తై పిగిలి పోతుంది! 

ఆ కలిసొచ్చే రోజు వస్తే నిన్ను మహారాణి లాగ చూసుకుంటా, నన్ను నమ్ము. అంతవరకు:

రవి గాంచని కవి గాంచని సుకుమారపు సౌందర్యమా, నా జన్మాంతర సౌహృదాలను మేళవించుకున్న స్వరరాగ సంరంభమా -  నన్ను క్షమించు!!!

యే గాడిద వెనక యెక్కినా యేముంది

సీ||   యే గాడిద వెనక యెక్కినా యేముంది
         తన్నులు తప్పవు! కడుపు చించు

         కొని పడు యాష్టయే గాని సుఖ సుఖాన
         ఉండనివ్వరు. అందరందరు తమ

         వైభవాల కొరకు, వ్యవహారములు చక్క
         బెట్టుకొనుటకే భ్రమలను చూపి

         అధికార పీఠముల కెగబాకెడి తుఛ్ఛు
         లే తప్ప కానరారేమి సాధు

తే||   సజ్జనుల రక్ష జేసెడి సాహసులు?అ
         దేమి ఆదికాలమున చేసినట్టు
         అందరికి దేవిభాగమును పంచెడి సక
         లజన హృదయాధి నాధు డొక్కడును లేడు?!
(03/03/2014)
-----------------------------------------------------------------------------------------------------------------
శ్లో|| సంగచ్చద్వం సంవదద్వం
       సంవో మనాసి జానతాం
       దేవీభాగం యధా పూర్వే
       సంజా నానా ఉపాసతే!

ఋగ్వేదం లోని ఈ మంత్రం యొక్క సారాంశ మిది -

"కలిసి నడుద్దాం.కలిసి మాట్లాడుకుందాం.కలిసి మెలిసి ఒకరి మనస్సు లొకరం తెలుసుకుందాం.మన పూర్వులు దేవీభాగాన్న్ని యెలా పంచుకునేవారో అలాంటి జ్ఞానాన్ని ఉపాసింధుదాం!"

దేవీభాగం అంటే - పసిపిల్లలకూ, దంతాలు లేని వృద్ధులకూ మెత్తని మాంసం మొదట ఇవ్వాలి.తర్వాత దౌహృదులకి - రెందు హృదయాలు ఉండే గర్భవతులకి రెట్టింపు మాంసం ఇవ్వాలి.అలా వారందరికీ పంచగా మిగిలిన మాంసాన్ని యువతీ యువకులకీ, జవసత్వాలు గలిగి సంపద పెంచే ఇతరులకీ పెట్టాలి.

ఈ మంత్రం వల్ల - ఆనాటి సాంఘిక వ్యవస్థ తీరు తెన్నులు తెలుస్తున్నాయి."ఓపిన కొద్దీ పని.అవసరం కొద్దీ అనుభవం" అనే ఆదర్శవంతమయిన సామ్యవాదానికి ఆనాటి మానవుడు యెంత దగ్గిరగా వెళ్ళాడో అర్ధం చేసుకోవచ్చు.

కర్మయోగ భావబీజ దళద్వయం

సీ||     ఊపిరి పీల్చడ మొకటే మనిషి బతి
        కుండటాన్కి గురుతు కాదు - చేస్తు

        వుండాలి యేదోక ఒపయుక్త కర్మ - ఉ
        న్నావు గనక చేసినావు, చేస్తు

        వున్నావు గనక నీవున్నావు అనేట్టు
        వుండాలి! "ఇప్పటి వరకు యేమి

        చేశాము?ఇకముందు చేయబోయేది యే
        మిటి? ఎలా చెయ్యాలి? ఎప్పటి కది

తే||    పూర్తి చేద్దాము? ఎవరి తోడ్పాటు తీసు
       కుంటె త్వరగా అది అవుతుంది?" - మాట
       మాట లోనూ మనసు లోని మధన లోను
       ఇదియె కదలాలి - ఫో, పని చెయ్యి, చెయ్యి!
(10/01/2003)
మూలం: ఇది ఒక ఆఫీసులో నేను చూసిన ఒక మంచి కొటేషన్ చుట్టూ అల్లిన పద్యం.

To be is to do - PLATO
(ఉండటం అంటే చెయ్యటం)

To do is to be - SOCRATESE
(చెయ్యటం అంటే ఉండటం)

Go be do be do - SINATRA
(వెళ్ళు చెయ్యి, చేస్తు ఉండు)

ముగ్గురు వేదాంతులూ చెప్పిన ఒకే విషయం పని చెయ్యటం గురించి అనేది అర్ధమయ్యి, పని చెయ్యటానికీ బతకటానికీ ఉన్న సంబంధం అర్ధమయ్యీ ఇలాగ నా సొంత మాటల్లో....

సీ||     తిండి తినుట, తిని పండుకొనుట, బోరు 
          కొడితె సైన్మలు షికార్ల కేగు

          ట - ఇవి కావు పనులంటే; బతుకు గడిచేందు
          కవసరమయిన పైకమును దెచ్చు

          పనులె పనులు ధరపైన మనుషులకు.
          తగు లాభ ఇచ్చెడి పనులు తప్ప

          ని సరిగ చేయాలి - హుషారైన 
          పనిని లాభకరంగ మల్చగలిగి


తే||    తే బహు శభాషు! ఒక్కడివే మరెవరి
       తోడు లేక ఏ పని చేయబోకు - నలుగు
       రి కుపయోగ పడ్తు నలుగురి నుపయుక్త
       పరుచుకుంటు బతకడమే మనిషికి విధి!
(10/09/2004)
మూలం: దీనికీ ఒక మంచి కొటేషనే - రాజ్ కపూర్ చెప్పిన మంచి మాట:
What is it after all taht men wants? Money, position, success - all are secodery. The basic thing is tomarrow, the future. The knowledge and promise that tomaarow will be better tan today. Nothing else matters to him!

సౌందర్యం - ప్రణయం : ఒక చిరు కావ్యం!

BEAUTY
=======
               The positive Driving Action of an object upon the senses by its inherent peculiar symmetry which is specific to that thing only is BEAUTY!
------------------------------------------------------------------------------------------------------------
సీ||     ఒక రూపమున్ జూసి చూడగనే దగ్గ
        రి తనము నందు భావించి,

        తనదు లలితమౌ సుధాకలిత కలస్వ
        నముల వినంగ ముదము రహించి,

        తనువుచే కుదురు నతి చనువు సాధింప
        సతతము యత్నముల్ సలప జూచి,

        మరియున్ తలపులకే మనసునందు హుషారు
        రేగి సంబర మొందు రేయి పవలు -

తే||    నీ గుణమ్ము లెవని మదినందు కదులు;
       వాడు నావలె - వలపు సుధా జలధిన
       బాగుగా దిగి - కవితల నల్లు సొగసు
       గాను, కాలము నిలుపగ వాని చరిత!
(హరి.S.బాబు:06/10/1986)
------------------------------------------------------------------------------------------------------------
LOVE:
=====
           The Positive Sensual Force towards a thing of beauty that Leads the Person to achieve the most possible deep closeness with the Object through all the senses is LOVE!

శ్రీకారం చుట్టుకుంది బ్లాగు పుస్తకం

1.
సీ || శ్రీ అని అనగానె శ్రవణము రంజిల్లు!
       పలికేది తెలుగైన పరమ హాయి 

       చెవులను సోకి ఆ శ్రీకారమే రంజి
       లును గదా! అటుపైన లయను నింపు

       కొన్న పద్యమదైతె కండచక్కెర నందు
       లో కలిపిన యటు లుండును గద!

       కొంత ఛందస్సు బిగింపు ఉండీ స్వేచ్చ
       చాల యెక్కువై పస గల కవుల

తే ||   కిష్టమౌ సీస పద్యమే ఐన పాలు 
       కలిపిన సత్వము గల్గు, నింక 
       రమ్య శైలితో క్షేమకరమగు భావ
       ములను చెప్పి పంచామృత మిత్తు మీకు.
(16/06/1996)
2.
సీ ||   నిన్నటి కాల మనాగరికము కాదు,
       నేటి కాలము నవీనమ్ము కాదు,

       రేపటి దూహించ రానిదియున్ గాదు,
       అంతయు నిటులనే యుండు నండి!

       ఆశలు, మోహముల్, బాంధవ్యములు గల
       మనబోటి సామాన్య మానవుల్, మ

       రి ధనాశాపరులు, ధూర్తులు, పదవీ లాల
       సులు, గోముఖ వ్యాఘ్రములు మరింక

తే ||   చెప్పనేల - అందరు సహచరులుగా బ
       తక వలసినదే కాలమేదైన గాని!
       మంచి చెడులు కాలాల యందు లేవు,
       మనము బతికేటి పధ్ధతే మనకు రక్ష!
(14/07/1993)
3.
సీ || లెక్కకు మిక్కిలి యైనను  కొద్ది తే
     డా సైత ముండని రాజకీయ

     పార్టీలు గల జాతి, పటుతరమౌ స్వార్ధ
     మున జను ల్విడిపోయి మలిన పడ్డ

     జాతి, కలహముల కాపురమై పరు
     లకు రాజ్య మిచ్చియు లేశమైన

     సిగ్గు నేర్వని జాతి, శిష్ట జనుల రక్ష
     జేయు సంకల్పము లేని దేబె

తే || ప్రభువులను భరించెడు జాతి - క్రమ వినాశ
     నానికి గురియై, తేజము నీరసించి
     శత్రువులకు నవ్వు గొల్పును - చవటలు తెగ
     పెరిగి దొంగల దోపిడి వెల్లువౌను.
(05/05/1993)
4.
సీ || తొలినాటి భోగాల తుంపర్లకే సంబ
     ర పడుతు యెగిరెగిరి పడతారు -

     కాలమట్లు గడిచి కమ్ముకు వచ్చెడి
     తమ పాప ముప్పెనై తమనె ముంచు

     ముందరి కాలపు ముచ్చటన్ కనలేరు
     దొంగలు, మాఫియా దొరలు, లంచ

     గొండ్లాదిగా గల ఘాతుక జను లతి
     శయముచే కండ్లు మసకలు గమ్మి!

తే || తగిలెనా మాడదిరిపోవు దెబ్బ, అపుడు
     తెల్సి ఒదిగి పోవుదు - రపుడున్ తప్పు నెరుంగ
     కుండ రెచ్చెపోయెడు వార్కి కుక్కచావు
     సిధ్ధమై ఉంది; లేదిందు సర్దుబాటు.
(27/12/1993)
5.
సీ || అరె! జాతిభేదము లణగార్చుకో వదే
     ల? మతము లన్నియు లోకశాంతి

     గోరుచు ప్రవచించగా వినవేంటి? భూ
     గోళ మంతటి నగ్నిగోళ సదృ

     శంగ  చేస్తావేంటి? సాటి మనిషి శతృ
     వైన కధేమిటి? వైరభావ

     ము తొలుతే పెంచుకు మాజాతి గొప్పద
     ని ముసుగుల్ తొడిగేటి నీచుడ, చిరు

తే || భేదములను సహించుము, బుధ్ధి పైత్య
     మేల? దైవమే మావాడు మే మధిక త
     రుల మనంటూను యెగిరెగిరి పడతావు -
     నిన్ను మించువా డొస్తేను నీ గతేంటి?
(03/08/1993)
6.
సీ || సంపెంగ పువ్వుకు అందమేల? మధుర
     మౌ చక్కెరకు పరిమళము లేల?

     రాగాలు పలికించు రాణివీణకు అలం
     కారము లేల? చక్కని కళలకు

     రంగు హంగులును ఆడంబరము లవి యే
     ల? కవిగాళ్లకు డబ్బుల పెరపెరలు

     యేల? నీతికి నిల్చి వేటుకు భయపడు
     టేల? ప్రజాసేవ చేయటాన్కి

తే || పదవు లేల? ఉపాయము గలవాని
     కాపద భయమేలా? ధర్మ కార్య నిర్వ
     హణకు పిలుపు లేల? ఘన మహాత్ములార
     ఆచరణ లేని ఉత్త సిధ్ధాంత మేల?
(27/08/1996)
7.
సీ || పోయెన్ కుసుమ కోమలోజ్వల సౌరభ
     ములు భూమిపై నుండి - మూక పెరిగి,

     ఇరుకుతనము పెరిగి,మురికియును, మరి
     కిలుము జిడ్డు ముదిరి, కర్బన ద్వ

     యామ్లజని విషపదార్ధమై , కరగని
     ధూళులు నీటి యందమితమై పె

     రుగుచు ధరణి పెద్ద రొచ్చుగుంటై పోయె!
     మనుషుల ఆంతర్యములును సరిగ

తే || లేవు - పరధనాసక్తియు, లోభము, మర
     సూయలున్ మస్తుగా మనసులకు పట్టి
     వేసెను, మనిషి నుండి వివేకము తొల
     గంగ - ముక్కులు బద్దలౌ కంపు మిగిలె!
(27/08/1996)
8.
సీ|| ఇచట ఈ నేలపై విరిసి గుబాళించు
    పువ్వులన్నియు ఒకటై పరిమళములు

    గాలిలోన కలిశాక మరి వాటిని విడ
    దీయలే నట్లుగా -  తల్లి గర్భ

    మున నుండి జనియించి మనుగడ కీ నేల
    నే యెన్నుకొన్నట్టి దేశ పౌరు

    లందరున్ సోదరులంతగ కలిసి పోయి
    తమ తమ వృత్తులు తగు విధంగ

తే|| చేసుకొంటు - సహాయముల్ చేసుకొంటు
    ఒకరి పనుల కింకొకరు చేదోడుగా ని
    లుస్తు - సంపదల్ పెంచుకొంటు మరి పంచు
    కొంటు బతకండి హాయిగా కక్షలొదిలి.
(15/03/1994)
9.
సీ|| నీతిగల మనిషి నడతలో తీరైన
    సౌందర్య ముండును, స్నేహపాత్ర

    మౌ ఈ నడత గల మనుషులచే యేర్ప
    డు కుటుంబము ప్రేమకు నెలవౌను!

    ఇట్టి కుటుంబాలు నిండిన దేశము
    లో సుఖశాంతులు లాతియౌను.

    అన్ని దేశము లిటుల సుఖాలు రుచి చూసి
    కలహాల నష్టము గణన చేసు

తే|| కుంటె అప్పుడు యుధ్ధాల కాంక్ష తగ్గి
    సమతకున్ పెద్ద పీట వేస్తారు - జనులు
    ఆయుధ బలగమును చూసి గాక యెగురు
    శాంతి పావురమును చూసి సంతసింత్రు!
(06/05/1994)
10.
సీ|| మేలు జరుగుగాక మేదినిపై గల
    సకల జనులకు - స్వస్తి భవతు!

    రక్షించబడు గాక రమణులు,వృధ్ధులున్,
    శిశువు లనాధలున్ - స్వస్తి భవతు!

    కలియుగాక సఫలకర్ములై దేశదే
    శాల పౌరజనులు - స్వస్తి భవతు!

    నశియించి పోవలె నీచులున్, దుర్మతుల్
    శాంతమార్గముననె - స్వస్తి భవతు!

తే|| చెలుల కిష్టులౌ మగలార స్వస్తి భవతు!
    చదువు చెప్పు గురువులార స్వస్తి భవతు!
    సమత పెంచు నాయకులార స్వస్తి భవతు!
    సేద్య మొనరించు సైరికా స్వస్తి భవతు!!
(04/06/1996)